Konstituimi i Kuvendit të Kosovës ka dështuar për të dhjetën herë, mes përplasjeve politike për zgjedhjen e kryeparlamentares.
Megjithatë, një nga momentet më të dallueshme gjatë këtyre seancave ka qenë sjellja e deputetit të PDK-së, Elmi Reçica, i cili në mënyrë të vazhdueshme ngrihet në këmbë për t’i përshëndetur deputetët e Listës Serbe me një afërsi të dukshme.
Pamjet e kapura nga mediumi KosovaNews, dëshmojnë se, në çdo seancë, sapo Reçica i vëren deputetët serbë, ai shpreh një gatishmëri të menjëhershme për komunikim, duke realizuar biseda miqësore dhe duke treguar një qasje të ngrohtë ndaj tyre.
Kjo sjellje ka tërhequr vëmendje të veçantë duke pasur parasysh se Elmi Reçica, i njohur gjatë luftës së fundit si “Komandant Petriti”, ka pasur një rol të rëndësishëm brenda UÇK-së.
Po ashtu, pas luftës, Raçica ka qenë figura e dytë në SHIK dhe një nga liderët kyç të PDK-së, duke shërbyer si deputet në disa legjislatura.
Në seancën e sotme, për herë të dhjetë, konstituimi i Kuvendit dështoi, por përshëndetjet e përzemërta të deputetit Reçica ndaj kolegëve të Listës Serbe mbetën një rit domethënës, të cilin ai e ka përsëritur në vazhdimësi që kur nisi procesi për legjislaturën e re.
