Presidentja e Republikës së Kosovës, Vjosa Osmani, ka njoftuar sot hapjen zyrtare të Ambasadës së Kosovës në Kuala Lumpur, Malajzi. Në një postim në rrjetet sociale, Osmani e cilësoi këtë hap si një “dritare të re” për vendin, duke theksuar mundësitë për bashkëpunim të thelluar me Malajzinë.
“Sot hapëm Ambasadën e Republikës së Kosovës në Kuala Lumpur, Malajzi. Një dritare e re për vendin tonë, me plot mundësi për bashkëpunim edhe më të thellë me Malajzinë,” shkroi Presidentja Osmani.
Ajo theksoi rëndësinë e pranisë së fuqishme diplomatike të Kosovës në një nga rajonet më strategjike të Azisë, duke shtuar se kjo ambasadë do të shërbejë si një “shtëpi më shumë e Kosovës”, ku do të avancohen interesat e qytetarëve, do të fuqizohen aleancat dhe do të mbrohet sakrifica e popullit të Kosovës për liri dhe shtet.
.
“Një prani edhe më e fuqishme diplomatike në një nga rajonet më strategjike në Azi. Një shtëpi më shumë e Kosovës, ku do të avancohen interesat e qytetarëve tanë, do të fuqizohen aleancat tona dhe do të mbrohet me vendosmëri shenjtëria e sakrificës së popullit të Kosovës për liri e shtet,” përfundoi Osmani.
Hapja e kësaj ambasade shënon një hap të rëndësishëm në zgjerimin e pranisë diplomatike të Kosovës në rajonin e Azisë Juglindore dhe pritet të forcojë marrëdhëniet bilaterale me Malajzinë në të ardhmen.
