Luftimet po shpërthejnë në Gaza pasi furnizimet me ushqime po mbarojnë, ka njoftuar një zyrtar i Kombeve të Bashkuara, ndërsa bllokada totale e linjave të furnizimit të Gazës nga Izraeli hyn në ditën e saj të 60-të.
Që nga 2 marsi, Izraeli ka ndërprerë plotësisht furnizimet për 2.3 milionë banorët e Rripit të Gazës dhe rezervat ushqimore të grumbulluara gjatë një armëpushimi në fillim të këtij viti janë zhdukur.
Bëhet e ditur se kjo është bllokada më e gjatë me të cilën është përballur ndonjëherë Rripi i Gazës.
Palestinezët dhe zyrtarët e ndihmës thanë se të paktën pesë grabitje kishin ndodhur në të gjithë enklavën ditën e kaluar.
Olga Cherevko, një punonjëse me zyrën humanitare të OKB-së (OCHA) në qytetin e Gazës, tha se dhuna në komunitet mbi furnizimet ishte rritur.
Ajo u tha gazetarëve se ishte dëshmitare e një përleshjeje të tillë.
“Furnizimet janë duke u pakësuar ndërsa lufta është ndezur, furnizimet ushqimore tani kryesisht janë zhdukur”, tha ajo në një konferencë shtypi në Gjenevë.
“Qasja në ujë është bërë e pamundur. Në fakt, ndërsa po flas, këtu poshtë, përballë këtij pallati, njerëzit po luftojnë për ujë. Sapo ka ardhur një kamion uji dhe njerëzit po vrasin njëri-tjetrin për ujë”, shtoi Cherevko.
Ndryshe, disa grupe ndihmash thonë se u kanë mbaruar furnizimet ushqimore gjatë javës së kaluar dhe se kuzhinat janë në rrezik të mbylljes.
Edhe Kryqi i Kuq ka deklaruar se përgjigja humanitare në Gaza është në prag të kolapsit të plotë.
