Për herë të parë në Kosovë po qëndron për vizitë Presidenti i Komitetit Paralimpik Evropian, Raymon Blondel duke shënuar kështu një moment historik për lëvizjen paralimpike të Kosovës.
Ai është takuar me presidenten e Komitetit Paralimpik të Kosovës Njomza Emini me ç’rast kjo e fundit, në një konferencë për media tha se kjo vizitë është dëshmi e fortë që tregon mbështetjen e lëvizjes paralimpike evropiane për një vend të vogël si Kosova, por e cila përmes paraatletëve të saj synon të arrij majat e botës me rezultate sportive.
Ajo shtoi se Blondel përmes kësaj vizite u njoftua me pasionin që kanë paraatletët e Kosovës, por edhe t’i shoh sfidat me të cilat ballafaqohen këta paraatletë.
Tutje Emini theksoi gjithashtu se Blondel shprehu gatishmërinë e plotë për ta mbështetur Komitetin Paralinpik të Kosovës për t’i arritur objektivat e përcaktuara, sidomos ato për të pasur rezultate kulminante në garat ndërkombëtare që do të zhvillohen viteve në vazhdim.
Ndërsa, vet presidenti Blondel tha se ndihet krenar që pati mundësinë që ta vizitojë Kosovën. Ai tha se viti 2023 ishte shumë i veçantë për Komitetin Paralimpik Evropian pasi pranoi Komitetin Paralimpik të Kosovës si anëtar me të drejta të plota në gjirin e saj.
Blondel shtoi ai është në Kosovë për të dëshmuar afërsinë që Komiteti Paralimpik Evropian do ta ketë vazhdimit me lëvizjen paralimpike të Kosovës, derisa theksoi se është i mahnitur me avancimin e kësaj lëvizje në fushën e sportit, duke u shprehur i bindur se rezultatet në paraolimpiadat apo kampionatet evropiane të sporteve paralimpike për Kosovën do të vijnë shumë shpejtë.
Ndryshe KPK është anëtar i Komitetit Ndërkombëtar Paralimpik (IPC) që nga viti 2022, duke i dhënë Kosovës të drejtën të marrë pjesë në Lojërat Paralimpike dhe të organizojë ngjarje zyrtare nën ombrellën e IPC-së.
