Dhoma e Tregtisë dhe Industrisë në Kosovë përshëndetë vendimin e marrë në takimin ndërmjet Qeverisë së Republikës së Kosovës dhe Qeverisë së Republikës së Shqipërisë, përmes së cilit janë koordinuar për ndërtimin e projektit tregtar në Porto-Romano, integrimi me hekurudhën Durrës-Prishtinë dhe Porti i Thatë në Kosovë.
Ministri i Mjedisit, Planifikimit Hapësinor dhe Infrastrukturës, Liburn Aliu ka prezantuar kohë më parë projektin për ndërtimin e hekurudhës Prishtinë – Durrës.
Ministri Aliu atë kohë pati thënë se ndërtimin i kësaj hekurudhe do ta bënte Prishtinën, konkretisht shtetin e Kosovës, një pikë të rëndësishme të shpërndarjes së mallrave, përmes lidhjeve infrastrukturore – hekurudhore që lidhin rajonin me pjesë të ndryshme panevropiane.
“Mund të them se ky projekt po merr rrugën e vet dhe jemi në faza ku tashmë mund të fillojmë edhe me hartimin e një plani të menaxhimit të saktë, i cili përfundon së shpejti dhe do të na japë të qartësi edhe në aspektin kohor dhe financiar të realizimit të këtij projekti”, ka thënë Aliu.
E sot Dhoma e Tregtisë dhe Industrisë në Kosovë konsideron që ky vendim do të ndikoj pozitivisht në rritje të stabilitetit, sigurisë si dhe zhvillimit ekonomik në vend duke rritë shpejtësinë e qarkullimit dhe ulë kostot e transportit dhe lëvizjes së qytetarëve.
Mirëpo Dhoma e Tregtisë dhe Industrisë në Kosovë kërkon dy linja të hekurudhës.
“Me fillimin e punës se Hekurudhës, Kosova do të behët qendër e qarkullimit të mallrave dhe qytetarëve në Ballkan. Megjithatë, konsiderojmë që hekurudha duhet të jetë me dy linja, që njëkohësisht mund të kemi edhe vajtje edhe ardhje, sepse duke qenë dy drejtimëshe ofron shumë më shumë mundësi”, thuhet nga Dhoma e Tregtisë dhe Industrisë.
Kjo organizatë konsideron se ndërtimi i hekurudhës me një linjë as për së afërmi nuk i plotëson kërkesat e bizneseve e të qytetarëve për të rritur shpejtësinë e dërgimit të mallrave dhe qarkullimit të qytetarëve.
Dhoma e Tregtisë dhe Industrisë Kosovë përkrahë iniciativat të cilat rrisin bashkëpunimin kombëtarë, si dhe ndikojnë pozitivisht në ekonominë e dy shteteve.
