Kryetari i Aleancës për Ardhmërinë e Kosovës, Ramush Haradinaj, në një takim me kryetarin e Organizatës së Veteranëve të Luftës së UÇK-së, Hysni Gucati, ka theksuar se shteti ka detyrim moral dhe institucional ndaj luftëtarëve të Ushtrisë Çlirimtare të Kosovës (UÇK), të rënëve dhe familjeve të tyre.
Në një postim në Facebook, Haradinaj bëri të ditur takimin me udhëheqjen e OVL të UÇK-së, ku ka ndarë shqetësimet për kategorinë më meritore për lirinë e Kosovës.
“Krerët e luftëtarëve të lirisë, i sigurova se siç kam qenë përherë pranë tyre, unë dhe Aleanca mbetemi në mbështetje të kërkesave të tyre legjitime, në funksion të së drejtës dhe dinjitetit që u takon. Shteti i Kosovës, i ndërtuar mbi sakrificën e Ushtrisë Çlirimtare të Kosovës, ka detyrim moral e institucional ndaj luftëtarëve, të rënëve dhe familjeve të tyre”, ka shkruar Haradinaj.
