Fondi Monetar Ndërkombëtar (FMN) ka ulur parashikimet e tij të rritjes ekonomike për Shtetet e Bashkuara dhe Kinën, duke paralajmëruar se tarifat e reja amerikane dhe reagimi nga partnerët tregtarë shënojnë hyrjen e botës në një “epokë të re”.
Ekonomia globale do të rritet 2.8 për qind këtë vit, llogarit FMN, duke ulur me gjysmë pikë përqindje vlerësimin e saj të janarit.
Në vitin 2026, rritja duhet të përshpejtohet vetëm pak, në 3 për qind, tregojnë llogaritjet e reja. Në janar, FMN-ja priste që aktiviteti të rritej 3.3 për qind.
Parashikimet “referenca” përfshijnë njoftimet e tarifave të SHBA midis 1 shkurtit dhe 4 prillit dhe përgjigjen nga vendet e tjera, tha FMN.
Sistemi ekonomik global po ndryshon rrënjësisht dhe ne po hyjmë në një epokë të re, shkroi kryeekonomisti i huadhënësit ndërkombëtar Pierre-Olivier Gourinchas në një postim në blog.
“Qe nga fundi i janarit, një valë e njoftimeve të tarifave të SHBA-së, fillimisht duke synuar Kanadanë, Kinën, Meksikën dhe sektorët kryesorë, kulmoi më 2 prill me tarifa pothuajse universale. Tarifat efektive të SHBA-së kanë tejkaluar nivelet e Depresionit të Madh dhe përgjigjja nga partnerët kryesorë tregtarë ka rritur ndjeshëm normën globale të tarifave”, shkruan Gourinchas.
Përshkallëzimi i papritur i tensioneve tregtare dhe “nivelet jashtëzakonisht të larta” të pasigurisë do të ndikojnë ndjeshëm në aktivitetin ekonomik global.
“Ndikimi është mjaft domethënës dhe përfshin të gjitha rajonet e botës. Ne po shohim rritje më të dobët në SHBA, Eurozonë, Kinë dhe pjesë të tjera të botës,” tha Gourinchas.
Ekonomia amerikane duhet të rritet me 1.8 për qind këtë vit, përllogariti FMN, duke ulur vlerësimin e janarit me 0.9 pikë përqindjeje.
Në vitin 2026, ekonomia më e madhe në botë duhet të rritet 1.7 për qind, 0.4 pikë përqindjeje më e dobët se sa pritej në fillim të vitit, për shkak të pasigurisë politike dhe tensioneve tregtare.
FMN nuk po parashikon një recesion në SHBA, tha Gourinchas, por shanset për një rënie të aktivitetit ekonomik janë rritur nga rreth 25 në 37 për qind.
Ekonomia kineze duhet të rritet me katër për qind këtë vit dhe vitin e ardhshëm, vlerëson FMN. Në janar, ata parashikuan se do të rritet 4.6 për qind në vitin 2025 dhe 4.5 për qind në vitin 2026.
Edhe parashikimet për Eurozonën janë ulur lehtësisht, me 0.2 pikë përqindjeje, ndaj aktiviteti në fushën e aplikimit të monedhës së përbashkët evropiane duhet të rritet 0.8 për qind këtë vit dhe 1.2 për qind në vitin 2026.
“Si në eurozonë ashtu edhe në Kinë, rritja këtë vit dhe vitin e ardhshëm do të mbështetet në një farë mase nga stimuli fiskal më i fortë,” vëren Gourinchas.
Tensionet tregtare dhe tarifat do të ngadalësojnë ndjeshëm GDP-në e Japonisë, përllogariti FMN, duke ulur parashikimin e saj për këtë vit me gjysmë pikë përqindjeje, në 0.6 për qind. E njëjta normë rritjeje pritet edhe në vitin 2026. Parashikimet e rritjes ekonomike të Indisë gjithashtu janë ulur pak, në 6.2 për qind këtë vit dhe 6.3 për qind në 2026. Sipas tyre, ekonomia ruse duhet të rritet 1.5 për qind në vitin 2025, por në vitin 2026 rritja pritet të ngadalësohet në 0.9 për qind.
