Në ambientet e Akademisë së Kosovës për Siguri Publike, Agjencia e Menaxhimit Emergjent organizoi ceremoninë e përfundimit të trajnimit bazik për 51 zjarrfikës të rinj. Ky trajnim kishte për qëllim përgatitjen profesionale të pjesëtarëve të Njësive Profesionale të Zjarrfikjes dhe Shpëtimit, në mënyrë që ata të jenë të gatshëm të përballen me sfidat e këtij profesioni dhe të kontribuojnë në strukturat profesionale të zjarrfikjes dhe shpëtimit.
Gjatë trajnimit, pjesëtarët e zjarrfikjes dhe shpëtimit u njohën me teknikat e avancuara të shuarjes së zjarreve, procedurat operative dhe përdorimin e pajisjeve të specializuara. Përveç aftësive teknike, ata mësuan rëndësinë e disiplinës, bashkëpunimit në ekip dhe elementeve kyçe për suksesin e një zjarrfikësi shpëtues.
Në ceremoninë e organizuar me këtë rast morën pjesë drejtuesit e institucioneve të sigurisë nga Akademia e Kosovës për Siguri Publike, Inspektorati Policor dhe drejtues të shërbimit zjarrfikës.
