Shefi i ekipit mjekësor të Papa Françesku deklaroi se ai ishte aq pranë vdekjes në një moment të trajtimit, saqë mjekët seriozisht menduan të ndërprisnin trajtimin për t’i mundësuar atij të përfundonte jetën në paqe.
Mjeku në spitalin e Romës, Sergio Alfieri, tha se Papa, pas një krize të frymëmarrjes më 28 shkurt, pati probleme të mëtejshme dhe pothuajse u mbyt nga të vjellat.
“Ekzistonte një rrezik i vërtetë që ai të mos e përballonte dot”, tha mjeku.
Ai theksoi se në atë moment mjekët duhej të zgjidhnin rrugën e mëtejshme të trajtimit.
“Duhej të vendosnim nëse do të ndalonim dhe ta linim ose të vazhdonim përpara me të gjitha ilaçet dhe terapitë e mundshme, duke u përballur me rrezikun e dëmtimit të organeve të tjera. Në fund, vendosëm të vazhdonim”, shtoi ai.
Papa 88-vjeçar u lirua nga spitali të dielën pas krizës më të rëndë shëndetësore gjatë 12 viteve të papatit të tij.
Ai u shtrua në spitalin Gemelli më 14 shkurt për shkak të një sulmi të bronkitit që u zhvillua në një pneumoni të dyfishtë, një gjendje veçanërisht e vështirë për të, pasi në rininë e tij kishte pasur pleurit dhe i ishte hequr një pjesë e një mushkërie.
Papës Françeskut i është rekomanduar të pushojë edhe dy muaj të tjerë pas daljes nga spitali për t’u shëruar plotësisht.
