Korporata Energjetike e Kosovës (KEK) ka publikuar një njoftim për media ku shprehet e kënaqur me rezultatet e arritura gjatë vitit 2024, duke e cilësuar performancën si “dukshëm më të mirë” në krahasim me vitin 2023.
KEK-u thekson se ka “përballuar me sukses sfidat që lidhen me teknologjinë e vjetër” dhe se rritja e prodhimit të energjisë elektrike dhe eksploatimi më i lartë i qymyrit kanë kontribuar ndjeshëm në përmirësimin e performancës.
Sipas të dhënave të publikuara nga KEK-u:
- Prodhimi i energjisë elektrike: Në periudhën janar-dhjetor 2023, bruto prodhimi i energjisë elektrike ishte rreth 5,534,196 MWh, ndërsa në të njëjtën periudhë të vitit 2024, ky prodhim arriti në 6,178,372 MWh, duke shënuar një rritje prej 11.65%.
- Prodhimi i qymyrit: Në periudhën janar-dhjetor 2023, KEK-u eksploatoi 6,923,659 ton qymyr, ndërsa në të njëjtën periudhë të vitit 2024 u eksploatuan 8,068,711 ton, duke shënuar një rritje prej 16.55%.
- Shitja e tepricave të energjisë elektrike: Shitja e tepricave gjatë periudhës janar-dhjetor 2023 ishte rreth 350,449 MWh, ndërsa për të njëjtën periudhë të vitit 2024 u shitën 645,824 MWh, duke shënuar një rritje prej 45.75%, ose rreth 295,375 MWh më shumë se vitin paraprak.
KEK-u e konsideron këtë performancë si një tregues të qartë të angazhimit të tij për të qenë një faktor kyç në furnizimin e qëndrueshëm me energji elektrike dhe për të kontribuar në zhvillimin e sektorit energjetik në vend.
