Barnatoret në sektorin privat, por edhe spitalet regjionale së fundmi janë përballur me mungesë të përfuzioneve si NaCl.
Një gjë të tillë e ka konfirmuar edhe Shoqata e Distributoreve të Produkteve Farmaceutike dhe Medicinale të Kosovës.
Sipas shoqatës, arsyeja kryesore për mungesën e këtyre produkteve është çmimi i miratuar nga Ministria e Shëndetësisë, i cili sipas tyre është shumë i ulët dhe nuk mbulon kostot reale të furnizuesve.
“Po, kemi informata për mungesë në sektorin privat të të gjitha përfuzioneve si NaCl, Glukozë dhe të tjera, të cilat për shkak të çmimeve tejet të ulëta të miratuara (nën çmimin furnizues) nga ana e komisionit për deklarimin e çmimeve pranë MSH, furnitorëve ju është pamundësuar furnizimi permanent dhe importi i këtyre produkteve”, ka thënë nga Shoqata
Në mediagjatë ditës së djeshme është raportuar se në Spitalin e Mitrovicës janë anuluar pesë operacione shkaku i mungesës së NaCl-së.
Por, pavarësisht kësaj, Ministria e Shëndetësisë në një përgjigje ka bërë të ditur se ka furnizuar të gjitha institucionet e Kujdesit Parësor Shëndetësor me produktet NaCl 0.9% në përmasa prej 500 ml dhe 100 ml, në përputhje me planifikimet dhe kërkesat e rregullta të QKMF-ve në nivel vendi.
“Konsiderojmë se nuk ka mungesë të këtij produkti”, thuhet në përgjigjen e Ministrisë.
Ndërkohë, sa i përket tregut të lirë, MSh bën të ditur se ditëve në vijim do të publikohet lista zyrtare e çmimeve për produktet që deri tani nuk kanë pasur çmime të përcaktuara.
“Operatorët do të pajisen me banderola me çmime të produkteve”, thuhet më tej në përgjigjen e MSh-së.
Mungesat e NaCl dhe medikamenteve tjera në barnatoret private, MSh thotë se kjo vjen si rezultat i produkteve të cilat nuk kanë deklaruar çmimin brenda afatit të caktuar, e rrjedhimisht, ato nuk mund të qarkullojnë pa një çmim zyrtar.
“Ministria e Shëndetësisë, me vendim, ka hapur afatin për deklarimin e çmimeve të produkteve që nuk kanë pasur çmime, janë produkte të reja dhe për ndryshimin e çmimit për ato produkte për të cilat është përcaktuar çmimi”, kanë theksuar nga MSh.
Sa i përket çështjes se disa depo furnizuese po ofrojnë barna me çmime të vjetra, të cilat nuk përputhen me listën e çmimeve të reja të miratuara nga Ministria e Shëndetësisë, kjo e fundit ka refuzuar të komentoi nëse ka pasur inspektime, duke thënë se inspektime janë kryer në barnatore.
“Lista zyrtare e çmimeve të produkteve medicinale, e miratuar me Vendim nr. 208/XII/2024 të Ministrit të Shëndetësisë, ka hyrë në fuqi më datë 01.02.2025. Nga kjo datë, Inspektorati Farmaceutik ka filluar zbatimin e këtij Vendimi të Ministrit, ku deri me tani janë kryer rreth 500 inspektime në qarkullues farmaceutik me pakicë (barnatore). Gjatë këtyre inspektimeve, është vënë re se barnatoret kanë filluar të zbatojnë këtë vendim”, thuhet në përgjigjen e MSh.
Gjithashtu, Ministria ka shtuar se “AKPPM ka vendosur çmimet sipas Listës Zyrtare në banderolat e produkteve medicinale në importet e reja”.
