Ministrja e Arsimit, Shkencës, Teknologjisë dhe Inovacionit, Arbërie Nagavci mori pjesë në konferencën “Ndikimi i PISA-s në informimin e politikave arsimore në Kosovë”, që ka karakter informues dhe është një hap domethënës për të kuptuar progresin në fushën e arsimit dhe për të koordinuar përpjekjet për një të ardhme më të mirë.
Ministrja Arbërie Nagavci përmendi rëndësinë e përgatitjeve për testin PISA, duke trajtuar disa prej çështjeve më të ndjeshme në sistemin arsimor të Kosovës.
Ministrja theksoi rolin e bashkëpunimit të shumë palëve në procesin e arsimit është një qasje e duhur dhe e domosdoshme për përmirësimin e cilësisë së arsimit, si dhe veprimi i koordinuar mes Ministrisë, drejtorëve të shkollave, mësimdhënësve, prindërve dhe vetë nxënësve është baza për të siguruar që politikat e hartuara të zbatohen me sukses në praktikë.
Arritjet e përmendura nga Ministrja Arbërie Nagavci tregojnë një përqendrim të dukshëm në përmirësimin e arsimit parauniversitar në Kosovë, si rritja prej 32% e buxhetit të arsimit nga 2020 deri në 2025, përmirësimet në infrastrukturën arsimore, rishikimi i teksteve të Gjuhës Shqipe dhe Matematikës për klasat 1-12, si dhe miratimi i rregullores për përzgjedhjen dhe emërimin e punonjësve.
Ndër të tjera, Nagavci tha se vendimi për të ndarë rezultatet individualisht me shkollat është një hap praktik dhe shumë i rëndësishëm për të nxitur transparencën dhe përmirësimin e cilësisë në arsim. Për më tepër, përfshirja e gjerë e ekspertëve, mësimdhënësve, prindërve dhe hulumtuesve gjatë procesit të rekomandimeve për testin PISA tregon një përkushtim të vërtetë për të adresuar sfidat në mënyrë gjithëpërfshirëse.
Ndërsa përmes linjës online, Drejtori i OECD-së për Arsim, Andreas Schleicher nënvizon rëndësinë e fushave themelore si matematika, shkenca dhe leximi në krijimin e një sistemi arsimor të suksesshëm. Ai tha se, këto fusha nuk janë vetëm shtylla të arsimimit cilësor, por janë edhe thelbësore për përgatitjen e nxënësve që të përballen me kërkesat e një bote gjithnjë në ndryshim dhe të tregut të punës.
