Real Madrid ka refuzuar mundësinë për ta transferuar Virgil van Dijk, pasi mbrojtësi holandez konsiderohet jashtë kriterit të moshës që kërkon klubi spanjoll.
Sipas raportimeve të “OkDiario”, agjentët e yllit të Liverpool e kanë ofruar atë te Real Madrid, por megjithatë, madrilenët nuk e kanë marrë parasysh një lëvizje të tillë, duke u shqetësuar për faktin se Van Dijk do të mbushë tridhjetë e katë vjet në korrik.
Gazetari spanjoll Eduardo Inda e ka bërë të ditur këtë informacion në emisionin “El Chiringuito”, duke theksuar se pavarësisht formës së tij të mirë fizike, mosha e tij është një pengesë për një transferim te kampionët e Evropës.
“Van Dijk është një nga mbrojtësit më të mirë të dekadës së fundit dhe i është propozuar Real Madridit. Megjithatë, Reali e ka refuzuar sepse beson se ai nuk është më në moshën e duhur për skuadrën”, ka thënë Inda.
Pavarësisht spekulimeve mbi të ardhmen e tij, mbrojtësi holandez pritet të vazhdojë karrierën e tij në Premier League edhe për sezonin e ardhshëm.
