Një konkurs i vitit 2022 është bërë shkak që një zyrtari të Komunës së Kamenicës t’i ngritet aktakuzë nga Prokuroria Themelore në Gjilan.
Shuajb Lakna, zyrtar në Drejtorinë e Arsimit në Komunën e Kamenicës po dyshohet se ka ndërhyrë në një test për mësimdhënës. Organi i akuzës po e ngarkon Laknën me veprën penale “Cenimi i të drejtave të punësimit dhe papunësisë”.
Aktakuzën, të cilën e ka siguruar KALLXO.com, e ngriti prokurori i shtetit, Isuf Sadiku më 28.02.2025.
Në aktakuzë pretendohet se Shuajb Lakna ia ka plotësuar disa pyetje një kandidateje në konkursin për edukatore.
“Më datë 10.02.2023, në Kamenicë, i pandehuri zyrtar personeli në K. E Kamenicës, me qëllim të mohimit apo kufizimit të personave të tjerë në të drejtën e punësimit në kushte të njëjta, ka vepruar në atë mënyrë që, në cilësi të anëtarit të komisionit përzgjedhës për rekrutimin në konkursin për motër edukatore për IP “Filizat” në Kamenicë, kandidates A. I. ia mbush testin dhe e njëjta fiton pikë më shumë se kandidatja tjetër”– thuhet në aktakuzë.
KALLXO.com ka provuar të kontaktoj me Shuajb Laknën për ta konfirmuar nëse ka pranuar aktakuzën, por i njëjti nuk është përgjigjur thirrjeve e as mesazheve në telefon.
Në aktakuzë ai citohet duke thënë se ‘nuk e pranon që ka ndërhyr’ë në testin e njërës prej kandidatëve në konkursin për edukatore.
Ai ka konfirmuar se ishte anëtar i komisionit vlerësues i emëruar nga kryetar i Komunës së Kamenicës, Kadri Rahimaj.
“E kundërshtoj raportin e ekspertimit nga AKF me të cilën ka konstatuar se shkrimi në testin për motër edukatore të A. I. në pyetjen e dytë është shkruar nga unë Shuajb Lakna, duke u bazuar konkretisht në shkronja por edhe në presje, ndërsa e njëjta nuk më janë kërkuar nga ana e forenzikës shkrimet e më hershme para mbajtjes së testit për të bërë krahasimin” – citohet të ketë thënë i dyshuari, Lakna.
Në anën tjetër, aktakuzën e ka konfirmuar edhe Gjykata Themelore në Gjilan.
“Ju konfirmojmë se kemi pranuar një aktakuzë të datës 28.02.2025 ndaj të akuzuarit Shuajb Lakna, i cili akuzohet për veprën penale cenimi i të drejtave të punësimit dhe papunësisë nga neni 219 paragrafi 1 të Kodit Penal të Republikës se Kosovës (KPRK) dhe lënda gjendet në Degën e Gjykatës Themelore Kamenicë” – thuhet në përgjigje.
Në nëntor të vitit 2024, gjatë emisionit “Jeta në Komunë”, asamblistja nga Lidhja Demokratike e Kosovës (LDK), Egzona Isufi, e pyeti kryetarin e Kamenicës, Kadri Rahimajn, për arrestimin e zyrtarit komunal për plotësim të testit në konkursin e fundit për mësimdhënës.
Kryetari Rahimaj e kishte konfirmuar se zyrtari komunal është arrestuar.
“Është arrestu, është mbajtë nëse s’gaboj më pak se 12 orë… Nuk e di ku janë proceset e hetimit ” – kishte deklaruar Rahimaj.
Sipas Rahimajt, asamblistja Isufi duhet t’i kërkojë falje zyrtarit që e ka përmendur, sepse, sipas tij, ajo e ka njollosur emrin e tij.
Rahimaj u pyet se a ka nisur procedurë disiplinore ndaj zyrtarit që është arrestuar, por ai tha se nuk lejohet zhvillimi i procedurave.
“Natyra e veprës për të cilën pretendohet nuk ka të bëjë me zyrtarin fare” – kishte përfunduar Rahimaj.
