Ministri i Administrimit të Pushtetit Lokal, Elbert Krasniqi, ka deklaruar se do të jetë pjesë e kabinetit të ardhshëm qeveritar “vetëm nëse kryeministër është Albin Kurti”.
Ai ka thënë para mediave se gjatë këtij mandati ka pasur partneritet dhe bashkëpunim të shkëlqyeshëm me kryeministrin Albin Kurti.
“Po, do të jem pjesë e një koalicioni të ardhshëm e tash është mirë i definuar ky partneritet. Është gjithçka parimore dhe e bazuar në mirëbesim…S’ka asnjë dyshim se do të jem pjesë e koalicionit të ardhshëm qeveritar, e do të jetë vetëm pjesë e një koalicioni ku kryeministër është Albin Kurti”, u shpreh ai të mërkurën.
Krasniqi ka deklaruar se qasja e kushtëzimit mes partive nuk është “qasje e duhur për bashkëpunim”.
“Nuk besoj që qasja e kushtëzimit të ndërsjellë është qasja e duhur për bashkëpunim. Qasja e kushtëzimit nuk është qasje që e preferoj në politikë. Besoj që të gjitha komunitete kanë përfituar. Besoj fuqishëm që të gjithë kolegët e mi tashmë janë të bindur që politika e kushtëzimeve në funksionon dhe partneriteti zhvillohet në besimin e ndërsjellë”, ka deklaruar Krasniqi.
Krasniqi, kryetar i Iniciativës së Re Demokratike të Kosovës (IRDK) i ka marrë mbi 4.600 vota në zgjedhjet parlamentare të 9 shkurtit.
