Për herë të dytë brenda pak ditësh nga persona të panjohur janë djegur posterët e kryeministrit Kurti në Malishevë.
Për këtë ngjarje të shëmtuar ka reaguar Lëvizja Vetëvendosje në Malishevë e cila ka thënë se ky është një akt nga ata që i ka kapur panikun dhe ankthi i humbjes që i pret, ata tani janë hedhur në sulme vandaliste duke u përpjekur për herën e dytë brenda pak ditësh që ta njollosin figurën e Kryeministrit Kurti, duke shqyer e dëmtuar billbordin e tij të vendosur në hapësirën publike të caktuar ligjërisht.
VV- qendra në Malishevë ka ftuar organet e rendit që të hetojnë këtë akt vandalist dhe fajtorët të vihen para drejtësisë.
Më poshtë reagimi i plotë i Lëvizjes Vetëvendosje
Ja edhe një akt vandalist dhe i shëmtuar nga ata të cilëve paniku nga humbja u ka hyrë deri në palcë!
Pasi që u janë shterrur të gjitha mundësitë, si përdorimi i buxhetit të subvencioneve për blerjen e votave, pasi i kanë fryer listat e familjeve në skemën sociale, pasi i kanë stërmbushur shkollat me militant partiak me nga 3-4 orë mësimi krejt kjo me qëllim shantazhi dhe blerje votash, prapë se prapë çdo përpjekje e tyre për ta shpëtuar fatin e tyre politik për të mbetur me çdo kusht gjallë në skenën politike është e kotë sepse qytetarët e kanë braktisur prej kohësh mendësinë e kastave të tyre zhvatëse e klienteliste.
Të ndodhur në panikun dhe ankthin e humbjes që i pret, ata tani janë hedhur në sulme vandaliste duke u përpjekur për herën e dytë brenda pak ditësh që ta njollosin figurën e Kryeministrit Kurti, duke shqyer e dëmtuar billbordin e tij të vendosur në hapësirën publike të caktuar ligjerisht.
Këta që përdorin si mish për top njerëzit servilë të tyre veç edhe nja tre ditë kanë afat, sepse karriera e tyre politike merr fund me 9 shkurt.
Krejt çka do të mbetet nga e kaluara e tyre është kujtesa qytetare, për hajnitë, korrupsionin, dallaveret dhe trajtimin e Republikës si një plaqkë plotë 20 vjet paslufte sa ishin në pushtet.
Rrugëtimi politikë i tyre përfundon në mbrëmjen e 9 shkurtit, ndërsa qytetarët e bashkuar Cep më Cep do të vazhdojnë me mirëqeverisjen e Kryeministrit Albin Kurti dhe do të vazhdojnë mbështetjen e fuqishme për Lëvizjen VETËVENDOSJE!
Ftojmë organet e rendit që të hetojnë këtë akt vandalist dhe fajtorët të vihen para drejtësisë!
