Gjakova ishte ndalesa e radhës për Lidhjen Demokratike të Kosovës, aty ku para simpatizantëve shpalosën programin politik e projektet për këtë komunë. Kandidati i LDK-së për kryeministër, Lumir Abdixhiku tha se ndryshimi i premtuar po merr formë, trajtë e kuptim.
“Ky rrugëtim i yni historik po formësohet edhe në Gjakovë, Gjakovën e Lidhjes Demokratike të Kosovës. Kjo Gjakovë, djep i së djathtës, shtëpi e intelektualizmit, e përparimit. Kjo Gjakovë burim i sakrificës, dëshmorëve, patriotëve, simbol i dhimbjes, qëndresës e vetë rezistencës”, tha para gjakovarëve në tubimin politik.
Ai ka përmendur projektet që ka plan për këtë qytet, nëse arrin të jetë në krye të qeverisë pas 9 shkurtit.
“Ashtu siç është historiku juaj kulturor, ashtu do ta trajtojmë Çarshinë e Vjetër të Gjakovës, është pasuri kombëtare, do ta keni mbështetjen e LDK-së. Po ashtu, qeveria jonë parasheh që rruga nga Kosharja në bjeshkë të Botushës, të Babaj të Bokës deri në Bjeshkë të Brovinës të përfundohet me mbështetje të qeverisë qendrore. Rruga Dollc- Gjakovë do të përfundojë sa më parë. Do të jem në terren personalisht, që në javët e para të qeverisë së re, të shoh se si po shkojnë këto punime. Dhe për të gjithë sportdashësit, stadiumin e Gjakovës do ta keni të plotë, të keni jetë të mirë e sport, siç jeni sportdashës të mëdhenj. Për të gjithë të rinjtë , kemi programin kombëtar për trajnimin në teknologji. 40 mijë të rinj gjithandej Kosovës me fokus në Gjakovë, do të trajnohen në fushën e teknologjisë informative”, tha para gjakovarëve, Abdixhiku. .
Kreu i PDHDK-së, Zef Morina që është në listë zgjedhore me LDK-në, ka shprehur bindjen se së bashku do të jenë fitues më 9 shkurt.
“LDK duhet të fitojë besimin tuaj, siç e ka fituar në kohën e presidentit historik, Ibrahim Rugova. Programi i LDK-së, është programi më i mirë”.
Ndërkaq, Shefqet Shehu kryetar i Degës së LDK-së në Gjakovë dhe kandidat për deputet, tha se me Lumir Abdixhikun kryeministër, Gjakova do të përkrahet me gjithçka që i duhet.
