Kandidati i Lëvizjes Vetëvendosje për kryeministër, Albin Kurti në një tubim elektoral të mbajtur në Kaçanik ka shpalosur planprogramin e tij për katër vitet e ardhshme, si dhe ka treguar rezultatet e arritura gjatë mandatit të tij qeverisës.
Albin Kurti tha se gjatë këtyre katër viteve janë arritur investime rekorde në zhvillimin ekonomik si dhe është rritur buxheti nëpër të gjitha komunat e Kosovës për 44 përqind.
“44% eshtë rritur buxheti nëpër komunat e Kosovës. Nuk janë rritur vetëm investimet kapitale, por janë rritur edhe konsumi eksporti edhe investimet e huaja direkte janë dyshishuar. Është rritur edhe punësimi, sidomos punësimi i të rinjëve. Për më pak se katër vitë i kemi 80 mijë e më shumë të punësuar në Republikën e Kosovës, cep më cep”, ka thënë Kurti në tubimin e mbajtur në Kaçanik.
Mes tjerash, Kurti tha se me programin Superpuna janë punësuar mbi 14 mijë e të ri e të reja, si dhe kanë përfituar 9500 biznese nga ky program.
“Me programin superpuna janë punësuar 14 mijë të reja e të rinjë, gjysma vajza dhe djem dhe kanë përfituar 9500 biznese vetëm me programin superpuna, prej moshës 18 vjeç deri në 29 vjeç”, tha tutje kryeministri Albin Kurti.
