Komisioni Qendror i Zgjedhjeve (KQZ) në mbledhjen e mbajtur të hënën, ka akredituar grupin e parë të vëzhguesve të subjekteve politike të certifikuara për pjesëmarrje në zgjedhjet për Kuvendin e Kosovës, të cilat do të mbahen më 9 shkurt 2025.
Janë akredituar 2,274 vëzhgues, të cilët u takojnë subjekteve të 4 subjekteve të ndryshme politike:
Nga Partia Demokratike e Kosovës, 95 vëzhgues, Lidhja Demokratike e Kosovës 1,725 vëzhgues, Koalicija Vakat, 234 vëzhgues; dhe Demokratska Stranka, 220 vëzhgues.
Sipas KQZ-së subjektet politike të certifikuara, OJQ-të, organizatat qeveritare dhe ndërqeveritare, organizatat ndërkombëtare të specializuara të cilat merren me zgjedhjet dhe mbrojtjen e të drejtave të njeriut, mediat si dhe përfaqësuesit e vendeve të huaja, mund të dorëzojnë online kërkesën e tyre për akreditimin e vëzhguesve brenda afateve të përcaktuara.
