Në prag të festave të fundvitit janë rikthyer kolonat dhe pritjet e gjata të bashkatdhetarëve në vendkalimet kufitare të Kosovës me Serbinë. Në orët e mëngjesit fluksi i automjeteve të udhëtarëve që po vijnë në Kosovë, është më i lartë në pikat e kalimeve kufitare Merdar dhe te Dheu i Bardhë.
Qytetarët që frekuentojnë Merdarin duhet të presin në hyrje deri në një orë, ndërsa në dalje të kësaj pike të kalimit kufitar pritjet janë 3-5 minuta dhe nuk ka kolonë.
Në hyrje të pikës tjetër të kalimit kufitar Dheu i Bardhë janë krijuar kolona të gjata 300 metra dhe pritjet janë 40-60 minuta. Ndërsa në dalje të kësaj pike udhëtarët duhet të presin deri në 5 minuta dhe kolona e automjeteve është 100 metra e gjatë.
