Pas ish-komandantit të Ushtrisë Çlirimtare të Kosovës, Haxhi Shalës, edhe Ismet Bahtijari ka pranuar fajësinë për një akuzë për pengim dhe një akuzë për frikësim.
Kështu është bërë e ditur nga Dhomat e Specializuara të Kosovës, ku thuhet se kjo vjen pas marrëveshjeve për pranimin e fajësisë të publikuara të martën.
“Në marrëveshjen për pranimin e fajësisë të publikuar sot, Ismet Bahtijari pranon fajësinë për një akuzë për pengim dhe një akuzë për frikësim. Kjo vjen pas marrëveshjeve të ngjashme për pranimin e fajësisë të publikuara dje, ku dy të pandehurit e tjerë në çështjen gjyqësore gjithashtu pranuan fajësinë lidhur me këto akuza”, thuhet në njoftimin për media.
Po ashtu, sipas njoftimit të DhSK-së, marrëveshja për pranimin e fajësisë bazohet në “faktet e pranuara”.
“Marrëveshja për pranimin e fajësisë bazohet në “faktet e pranuara”, me çka z. Bahtijari pranon se disa fakte të paraqitura në aktakuzë do të vërtetoheshin jashtë dyshimit të arsyeshëm dhe janë të vërteta dhe sakta. Rregullorja e Procedurës dhe e Provave para Dhomave të Specializuara të Kosovës lejon që Prokurori i Specializuar dhe Mbrojtja të arrijnë marrëveshje për pranimin e fajësisë, e cila duhet të miratohet nga Trupi Gjykues para se të hyjë në fuqi”, thuhet tutje në njoftim.
Ndërsa, trupi gjykues është duke shqyrtuar aktualisht marrëveshjet për pranimin e fajësisë në këtë çështje gjyqësore.
