Një grup i madh banorësh të lagjes Sofalia në Prishtinë, mbrëmë i janë bashkuar Lëvizjes Vetëvendosje. Në mesin e të aderuarve është Drin Mehmetaj i cili ishte kryetar i nëndegës së LDK-së të lagjes Sofalia në Prishtinë, së bashku me të aderuan edhe dhjetëra anëtarë të LDK-së në këtë lagje. Ata tashmë kanë vendosur ta braktisin LDK-në për të ju bashkuar Lëvizjes Vetëvendsoje.
Kryetari i Lëvizjes Vetëvendosje, njëherazi Kryeministri i Republikës së Kosovës, Albin Kurti, i mirëpriti këta banorë të entuziazmuar në një takim mirëseardhës.
“Të nxitur nga dëshira për të ndihmuar në të ardhmen e Kryeqytetit dhe shtetit i janë bashkuar me entuziazëm Qendrës së Lëvizjes VETËVENDOSJE! në Prishtinë
Kjo frymë e bashkëpunimit, e rrënjosur në përkushtim, transparencë dhe përgjegjësi, forcon më tej qasjen tonë për një kryeqytet që u shërben qytetarëve, duke e mbrojtur Prishtinën nga kapja, korrupsioni dhe degradimi, e duke e udhëhequr drejt
përmbushjes së zotimeve që sigurojnë mirëqenie dhe zhvillim të qëndrueshëm.
Për këto motive ata të gjithë së bashku i ndanë rrugët me subjektin politik që po e dëmton kryeqytetin, LDK-në” thuhet në njoftimin e Qendrës së Lëvizjes VETËVENDOSJE! në Prishtinë.
Drin Mehmetaj ishte zgjedhur kryetar i nëndegës së LDK-së në Sofali vitin e kaluar, zgjedhjen e tij e kishte uruar kryetarja e Forumit të Gruas së LDK-së Jehona Lushaku duke e quajtur një djalë fantastik e profesionist.
“Kryetari i nëndegës, i zgjedhur sonte është një djalë fantastik e profesionist Drin Mehmetaj!” kishte thënë Lushaku.
