Komandanti i Forcës së Sigurisë së Kosovë, Gjenerallejtënant Bashkim Jashari, me ftesë të Komandantit të Forcave Amerikane për Evropë Christopher G. Cavoli, qëndroi për vizitë zyrtare në Komandën e Ushtrisë Amerikane për Evropë dhe Afrikë në Wiesbaden të Gjermanisë.
Gjenerali i ushtrisë së Kosovës mori pjesë në ceremoninë e pranim-dorëzimit të detyrës së Komandantit të Komandës së Ushtrisë Amerikane për Evropë dhe Afrikë, Gjeneral Darryl A. Williams, i cili ia dorëzoi detyrën Gjeneralit Christopher T. Donahue.
Sipas njoftimit nga Forca e Kosovës, Jashari falënderoi Gjeneralin Williams për mbështetjen e vazhdueshme për Forcën e Sigurisë së Kosovë dhe zhvillimin e saj.
“Të dy gjeneralët u pajtuan që marrëdhëniet bilaterale ushtarake mes Kosovës dhe SHBA-ve janë çdoherë e më të forta”, thuhet në njoftim.
Ndërkohë, Jashari pati takim njoftues me Gjeneral e ri Donahue me të cilin u pajtuan që bashkëpunimi bilateral të vazhdojë tutje përmes stërvitjeve, trajnimeve dhe aktiviteteve të përbashkëta bilaterale.
“Bashkëpunimi ushtarak dhe rritja e ndëveprueshmërisë mes FSK-së dhe Ushtrisë Amerikane për Evropë mbetet prioritet i komandantit të FSK-së në linjë me zhvillimin dhe modernizimin e Forcës”, thotë FSK-ja në njoftim.
