Dy persona janë qëlluar për vdekje të hënën në veri të Austrisë, ka bërë të ditur policia lokale.
Sipas njoftimit, Franz Hofer, kryebashkiak i Kirchberg ob der Donau, u vra në fshatin Altenfelden në rajonin rural Muhlviertel të Austrisë, afër kufirit me Gjermaninë dhe Republikën Çeke, raporton CNN.
Një burrë tjetër gjithashtu u qëllua për vdekje pak kohë më vonë, ka bërë të ditur për CNN zëdhënësja e policisë së Austrisë së Epërme, Ulrike Handelbauer.
Një operacion policor në shkallë të gjerë me helikopterë dhe forca speciale është duke u zhvilluar, ka bërë të ditur ajo.
I dyshuari besohet të jetë i armatosur dhe banorëve vendas u është thënë të qëndrojnë brenda.
“Fatkeqësisht, ne supozojmë se autori që po kërkojmë mund të jetë duke mbajtur armën”, ka thënë Handelbauer, sipas mediave lokale.
Një mosmarrëveshje mbi të drejtat e gjuetisë besohet se ka shkaktuar incidentin, sipas policisë.
Sipas “Kronen Zeitung”, një media lokale, i dyshuari ishte i njohur për gjuetarët në zonë.
“Ai ishte një person i vështirë”, ka thënë një gjuetar nga zona, i cili dëshironte të mos identifikohej.
