Komisioni Qendror i Zgjedhjeve ka njoftuar se në zgjedhjet e ardhshme për Kuvendin e Kosovës, sipas Ligjit të ri për Zgjedhjet e Përgjithshme, votuesit do të kenë mundësinë të zgjedhin deri në 10 kandidatë për deputetë të një subjekti politik.
Në zgjedhjet e kaluara ky numër ishte më së shumti deri në 5 kandidatë për deputetë nga një subjekt politik, por kjo është ndryshuar gjatë reformës zgjedhore të përfunduar nga Kuvendi i Kosovës në verën e vitit 2023.
Përmes një video zëdhënësi i KQZ-së, Vlamir Elezi ka shpejguar mënyrën sesi qytetarët duhet të plotësojnë fletëvotimin.
Votuesi duhet të shënojë një subjekt politik në anën e majtë të fletëvotimit dhe deri në 10 kandidatë në anën e djathtë.
Sipas KQZ-së, është e domosdoshme që votuesi të zgjedhë vetëm një subjekt politik, pasi nëse do të zgjedhë më shumë se një të tillë, atëherë fletëvotimi do të ishte i pavlefshëm.
Më shumë detaje mbi plotësimin e fletëvotimit mund ti mësoni në videon më poshtë.
