Britania e Madhe ka dërguar trupa shtesë dhe automjete ushtarake në Kosovë për stërvitje rutinore në kuadër të misionit paqeruajtës të NATO-s, KFOR.
Regjimenti Mbretëror i Jorkshërit mbërriti në Durrës, Shqipëri, dhe do të zhvendoset në Kosovë përmes rrugës tokësore.
KFOR-i ka njoftuar se stërvitjet do të zgjasin deri në fund të tetorit dhe do të testojnë procedurat për dislokimin e shpejtë të trupave.
Nuk është treguar se sa pjesëtarë të personelit apo automjete janë dërguar, por nga ana e tyre thuhet se do të bashkëpunojnë me njësi të tjera të KFOR-it në një stërvitje rutinë të provave operative.
“Qëllimi i këtij ushtrimi është t’i testojë procedurat ekzistuese për dislokimin e shpejtë të trupave shtesë dhe integrimin e tyre me misionin e KFOR-it. Stërvitja mbështet gatishmërinë e KFOR-it për t’iu përgjigjur zhvillimeve përkatëse të sigurisë, në mënyrë që të sigurojë zbatimin e vazhdueshëm dhe efektiv të mandatit tonë të OKB-së – bazuar në Rezolutën 1244 të Këshillit të Sigurimit të Kombeve të Bashkuara të vitit 1999 – për të kontribuar në një mjedis të sigurt për të gjithë njerëzit”, thuhet në komunikatën e KFOR-it të mërkurën.
Sipas njoftimit, ky kontingjent britanik do të kthehet në Britani sapo të përfundojnë ushtrimet.
