Presidenti serb ka dekoruar përfaqësuesit e Rusisë për, siç ka thënë ai, “ndihmën që na dhatë gjatë diskutimit për Rezolutën për gjenocidin në Srebrenicë” në Asamblenë e Përgjithshme të Kombeve të Bashkuara të mbajtur në maj.
Aleksandër Vuçiq ua dorëzoi Urdhrin e Flamurit Serb të nivelit më të lartë përfaqësuesit të përhershëm të Rusisë në Kombet e Bashkuara, Vasilij Nebeznji, si dhe Urdhrin e Flamurit Serb të shkallës së dytë zëvendëspërfaqësueseve Anna Jestignjeva dhe Maria Zbolockaja.
Notë proteste ndaj këtij veprimi ka kërkuar deputetja britanike, Alicia Kearns.
“Kjo është e jashtëzakonshme – Shpresoj se Britania dhe të tjerët do të protestojnë tek ambasadorët serbë”, ka shkruar ajo në platformën X.
Vuçiq në llogarinë e tij në Instagram ka shkruar për bashkëpunimin e ngushtë mes popujve dhe shteteve të tyre – Serbisë e Rusisë.
Rezoluta e miratuar më 23 maj 2024 u hartua nga Gjermania dhe Ruanda dhe e përcakton 11 korrikun si Ditë ndërkombëtare të përkujtimit të gjenocidit të vitit 1995, kur forcat serbe të Bosnjës vranë më shumë se 8.000 burra e djem myslimanë në Srebrenicë. Krahas kësaj, Rezoluta e dënon po ashtu mohimin e gjenocidit, një gjë që vazhdimisht është bërë nga zyrtarët serbë si në Bosnjë-Hercegovinë ashtu edhe në Serbi.
Kundër kësaj Rezolute kanë votuar Hungaria, Kina, Rusia, Bjellorusia, Kuba, Nikaragua dhe Siria. Vuçiq ka lajmëruar se do t’i dekorojë edhe përfaqësuesit e shteteve që votuan kundër miratimit të Rezolutës për Srebrenicën në Asamblenë e OKB-së.
This is quite extraordinary – I hope the UK and others will protest to Serbian Ambassadors. https://t.co/VhFuC0PnQm
— Alicia Kearns MP (@aliciakearns) September 24, 2024
