Pas më shumë se një muaji në arrati, Policia e Kosovës ka arrestuar të dyshuarit për përleshjen me thika, që ndodhi më 19 qershor, afër një lokali në Podujevë, ku mbeti i therur në qafë një 18-vjeçar.
Kështu ka konfirmuar zëdhënësja e Prokurorisë Themelore në Prishtinë.
“Janë arrestuar dy të dyshuar E.A., dhe E.Z të cili ishin përfshirë në një rast me 19 qershor në afërsi të një lokali në Podujevë. Të njëjtit janë shoqëruar në stacion policor për intervistim dhe më pas me urdhër të Prokurorit të Shtetit janë ndaluar për 48 orë. Të dyshuarit e ndaluar do të hetohen për veprën penale “lëndim i rëndë trupor””, tha Ulaj për Insajderin.
Në këtë përleshje që eskaloi pas një konflikti verbal kanë qenë të përshirë gjithsej 4 persona, në mesin e të cilëve edhe i riu që u ther me thikë. Ngjarja dyshohet se kishte ndodhur pas një mosmarrëveshje e cila daton që pothuajse një vit, për shkak të xhelozisë që kanë pasur palët mes vete.
18-vjeçari që u ther me thikë, atë natë kishte marrë ndihmë mjekësore në Emergjencën e Qendrës së Mjekësisë Familjare në Podujevë, e më pas është shoqëruar në stacion policor, ku ka dhënë deklaratë lidhur me rastin.
