Policia e Kosovës njofton se është arrestuar Z.A (40-vjeçar) nën dyshimin për kontrabandim me mallra. I njëjti ishte vetaksidentuar pasi tentoi t’i ikte zyrtarëve policorë.
Në njoftimin e Policisë thuhet se Stacioni Policor për Mbikëqyrje Kufitare-Hani i Elezit, të shtunën duke u bazuar në informatat inteligjente dhe gjatë aktiviteteve taktiko-operative në terren, rreth orës 20:00 në fshatin Seqishte të Hanit të Elezit, kanë vërejtur një automjet të dyshuar duke tentuar të kalojë vijën kufitare dhe menjëherë kanë marrë veprime për ta ndaluar.
“Drejtuesi i automjetit, me iniciale (Z.A.) i moshës rreth 40 vjeçare M/SH/RMV me të vëne re se është pikasur nga patrullat policore kufitare, duke tentuar për t’u larguar (ik) në drejtim të territorit të RMV-se, ka shkaktuar vet aksident me dëme materiale”, thuhet në njoftim.
Më tej, thuhet se Policia ka tërhequr automjetin me targa të Maqedonisë së Veriut dhe gjatë kontrollit të automjetit është vërejtur se brenda tij kishte të ngarkuara 120 palë atlete dhe 260 palë veshje sportive.
“Dyshohet se malli është tentuar të kontrabandohet nga territori i Republikës së Kosovës në territorin e Republikë së Maqedonisë së Veriut përmes rrugëve malore. Lidhur me rastin të gjitha veprimet janë ndërmarrë në bashkëpunim me Prokurorin e Shtetit, ku me urdhër të tij, i dyshuari dërgohet në mbajtje 48 orë”, njofton Policia.
Bëhet e ditur se malli i kontrabanduar dhe automjeti sekuestrohen dhe dërgohen në terminal doganor për procedura të mëtejme ligjore.
