Tre persona kanë marrë lëndime të lehta trupore në një aksident trafiku që ndodhi këtë të martë, rreth orës 07:11 në rrugën Carralevë-Duhël.
Aksidenti ndodhi mes një autobusi dhe një kamioni, ku autobusi është rrotulluar në krahë.
Sipas zëdhënësit të Policisë së Kosovës për rajonin e Prizren, Shaqir Bytyqi, zjarrfikësit kanë intervenuar për të nxjerrë pasagjerët nga autobusi.
Ndërsa, të lënduarit janë transportuar në Qendrën e Mjekësisë Familjare (QKMF) në Suharekë për ndihmë mjekësore.
“Sot më datë 10.09.2024, rreth orës 07:11 është raportuar për një aksident trafiku në rrugën Carralevë-Duhël. Në aksident janë të përfshirë një autobus dhe një kamion. Si pasoj e aksidentit së paku tre persona kanë pësuar lëndime të lehta trupore dhe janë transportuar për në emergjencë në QKMF në Suharekë”, ka thënë Bytyqi.
Policia ka mbërritur në vendngjarje dhe është duke hetuar shkaqet e aksidentit.
