Presidentja e vendit, Vjosa Osmani, gjatë kësaj jave është takuar me të ngarkuarën me punë të misionit të SHBA-së në Kosovë, Anu Prattipati.
Osmani e Prattipati folën për zhvillimet e fundit në vend, me fokus në zhvillimet e sigurisë dhe tema të tjera të interesit të përbashkët.
“Në takim u diskutua edhe për rëndësinë e bashkërendimit me partnerët e Republikës me qëllim të suksesit të qëndrueshëm në përmbushjen e objektivave të përbashkëta”.
“Tutje, pothuajse një vit pas aktit të agresionit të Serbisë ndaj Kosovës, Presidentja Osmani theksoi se mungesa e llogaridhënies dhe drejtësisë për personat përgjegjës është në dëm të paqes e sigurisë jo vetëm në Kosovë, por edhe në rajon”, thuhet në njoftimin e presidencës.
Tutje, Osmani tha gjatë takimit se ekzistimi i strukturave ilegale në veri, e mbanë peng integrimin e plotë të komunitetit serb dhe se luftimi i strukturave ilegale, sipas saj, është në dobi të vetë qytetarëve në atë pjesë dhe të sundimit të ligjit.
