Ministria e Brendshme Gjermane ka bërë të ditur se një polic në Munih, në afërsinë e Konsullatës izraelite, ka qenë i detyruar ta vrasë një person, i cili po kryente akt terrorist. Sulmuesi u identifikua si një 18-vjeçar me shtetësi austriake, por me prejardhje nga Bosnja dhe Hercegovina.
Autoritetet gjermane kanë njoftuar se policia e Mynihut ishte përfshirë në një shkëmbim zjarri gjatë së cilit u vra një sulmues.
Sipas njoftimeve, policët u përfshinë në shkëmbimin e zjarrit pasi qe një mashkull hapi zjarr në afërsinë e Konsullatës izraelite dhe muzeut përkujtimor për viktimat e holokaustit. Sulmuesi ka qenë i armatosur me një pushkë të gjatë dhe bajonetë dhe, kur policia tentoi ta ndalojë, ai hapi zjarr drejtë policisë, duke i detyruar ata të përgjigjen.
Policia deri më tani nuk ka komentuar rreth identitetit të sulmuesit, por mediumet e ndryshme kanë raportuar se ai është mashkull 18 vjeçar, me shtetësi austriake, por me prejardhje nga Bosnja dhe Hercegovina. Sipas raporteve, ai ka qenë i njohur për policinë austriake, pasi që ishte përkrahës i ISIS-it dhe, më parë, u ballafaqua me akuza për përhapje të propagandës së këtij grupi terrorist.
Edhe pse motivet e sakta të sulmuesit nuk dihen, disa zyrtarë kanë thënë se besojnë që sulmi mund të ketë qenë i lidhur me përvjetorin e sulmit në Lojërat Olimpike të Mynihut, në vitin 1972, gjatë së cilit u vranë 11 sportistë izraelitë dhe një polic gjerman. Në kohën e sulmit, në Konsullatën izraelite mbahej një shërbim përkujtimor për viktimat e sulmit të 1972-ës.
Zyrtarët policorë thanë edhe se besojnë që sulmuesi, ishte përgatitur për këtë sulm dhe shtuan se besojnë se ai nuk ka pasur bashkëpunëtorë, porse ka vepruar vet. Megjithatë, ata thanë se ky rast, edhe një herë, tregon rreziqet e propagandës ekstremiste në internet.
