Ish-kryetari i Lidhjes së Socialdemokratëve të Vojvodinës, Nenad Çanak, në një intervistë për gazetën serbe “Danas” ka thënë se informacionin për zhvendosjen e mundshme të serbëve nga veriu i Kosovës në Sanxhak e ka marrë nga shumë burime bashkë me kryetaren e Komitetit të Helsinkit për të drejtat e njeriut në Serbi, Sonja Biserko.
Çanak për Danas ka theksuar se populli duhet të bindet që Serbia nuk është më në Kosovë.
“Informacionin për zhvendosjen e mundshme të serbëve nga veriu i Kosovës në Sanxhak, Sonja Biserko dhe unë e kemi marrë nga më shumë burime. Kemi konsideruar se nuk duhet ta lëmë të kalojë pa u vënë re dhe të fillojë hedhja e fajit nga njëra palë në tjetrën, siç ka ndodhur edhe më parë gjatë historisë. Kemi konsideruar se këtë informacion duhet ta ndajmë me kryeministrin e Kosovës Albin Kurti, sepse ai e ka obligim të kujdeset edhe për sigurinë e serbëve në Kosovëi”, ka theksuar Çanak.
Çanak, ka thënë se kryeministri Kurti i ka dhënë të dhëna të policisë ku shihet se ka shumë më pak dhunë ndaj serbëve në baza etnike sesa është dhuna ndaj banorëve të tjerë të Kosovës.
“Kjo do të ishte shumë e rëndësishme kur flitet për terror ndaj serbëve në Kosovë, të flitet për informacione të verifikuara me emër dhe mbiemër, të dihet saktësisht se për çfarë bëhet fjalë. Unë do t’ju jap mediave informacione për deliktet e gjakut, kush janë autorët dhe kush janë viktimat në Kosovë, në mënyrë që të dihet saktësisht se çfarë ka ndodhur gjatë disa viteve të fundit. Armiku më i madh i paqes në këto hapësira janë gjysmë të vërtetat që janë sajuar për të krijuar panik”, ka deklaruar Çanak
Çanak ka thënë se Serbia nuk është në Kosovë. “Ejani vetë në Kosovë, shikoni dhe do të shihni. E gjithë kjo është propagandë që shërben që një pjesë e publikut të mashtruar në mënyrë populiste të mbahet nën kontroll. Por këtë duhet parë me Vuçiqin, jo me mua”, ka thënë ai.
