Kreu i Aleancës për Ardhmërinë e Kosovës, Ramush Haradinaj, ka drejtuar kritika ndaj Qeverisë Kurti, për të cilën ka thënë se po e mbyllë mandatin me shumë pak punë, investime e projekte.
Sipas Haradinajt, në tri vitet e para të kësaj qeverie, as nuk ka filluar e as përfunduar ndërtimi i asnjë rrugë të rëndësishme në vend, derisa shtoi se nga ndërprerja e projekteve të filluara dhe shkelja e kontratave me operatorët ekonomikë, rreth 60 përqind e të punësuarve kanë mbetur pa punë, shkruan Reporteri.net.
“Janë bllokuar punimet në ndërtimin e kategorisë se rrugëve të reja dhe të autostradave. Sipas publikimeve të ASK, në vitet 2021 dhe 2022 nuk është ndërtuar asnjë kilometër e rrugëve magjistrale dhe vetëm 9 kilometra rrugë rajonale. Sipas të dhënave të Buxhetit për vitin 2024, në periudhën 2021-2023, për ndërtimin e rrugëve të reja nuk është investuar asnjë cent, kurse për autostrada, vetëm 13 milionë euro. Të gjitha mjetet buxhetore të parapara për investime në këto kategori të rrugëve për vitin 2023, nuk janë shfrytëzuar por janë bartur në vitin buxhetor 2024, ndërkohë që mjete të reja për këtë vit, janë ndarë vetëm 10 milionë”, ka shkruar Haradinaj.
Tutje, ai ka thënë se rrugwt e rëndësishme që kanë filluar së ndërtuari para se kjo qeveri të vinte në pushtet, nuk do të përfundojnë deri në fund të vitit 2026.
“Sipas kornizës së shpenzimeve të parapara me ligjin e buxhetit, rezulton se të gjitha rrugët e rëndësishme, të filluara para vitit 2021, nuk do të përfundojnë deri në fund të vitit 2026. Me këto dinamika zhvillimore, Kosova edhe njëmijë vjet nuk do t’i mbërrijë vendet e zhvilluara!”, ka shkruar Haradinaj.
