Komisioni Hetimor Parlamentar për procesin e subvencionimit të blerjes së teksteve shkollore dhe mjeteve mësimore për nxënësit e nivelit të arsimit fillor dhe të mesëm të ulët për vitin shkollor 2023/2024 po mbanë mbledhjen e radhës me rend dite, miratimin e listës së dëshmitarëve.
Anëtarët e këtij komisioni propozuan që në lidhje me këtë çështje në komision të raportojnë ministrja e Arsimit, Arbërie Nagavci dhe të gjithë ata që kanë qenë në krye të këtij dikasteri që nga 2008-ta. Me shumicë votash, kjo pikë e rendit të ditës kaloi.
“Kërkesa jonë është që të raportojnë ministrat e Arsimit gjatë viteve 2008-2023, ata të Financave, sekretarët e MASHT-it, anëtarët e komisionit për shpërndarjen dhe monitorimin e shpërndarjes së teksteve shkollore, auditori i përgjithshëm.. Përveç këtyre mund të kemi edhe propozime tjera”, tha deputeti i LVV-së, Armend Muja.
Ndërkaq, ai i PDK-së, Bekim Haxhiu tha se nuk do të amnistohet asnjë person.
“Sa më shumë dëshmitarë, aq më shumë do të na ndihmonte në punën tonë. Nëse mund të shkojmë me dëshmitarë deri në 2008tën, sa të mbërrijmë do të ishte mirë të vazhdojmë me dëshmitarë që kanë shërbyer nga 2000-ta. Askush nuk do të amnistohet, as në të kaluarën. Por në veçanti ata për të cilët janë ngritur dyshime, për vitet 2023-2024”, shtoi ai.
Deputetët kërkuan që ekspertët t’ua dorëzojnë raportin final tri javë para përfundimit të mandatit.
