Dy oficerë policie janë shtruar në spital pas përleshjeve me protestuesit jashtë kongresit të AfD-së së ekstremit të djathtë të Gjermanisë, teksa partia u mblodh disa javë pas rezultatit rekord në zgjedhjet e Bashkimit Evropian.
Rreth 1,000 policë u vendosën në qytetin perëndimor të Essenit të shtunën, ku organizatorët e demonstratës thanë se 50,000 protestues marshuan drejt kongresit, raporton The Guardian.
Policia ka bërë të ditur se dy oficerë, një burrë dhe një grua, të cilët po shoqëronin një politikan, u lënduan rëndë kur protestuesit i goditën me shkelma në kokë pasi ata ranë në tokë.
Shtatë oficerë të tjerë gjithashtu u lënduan lehtë në përleshjet pranë sallës Grugahalle. Autorët janë larguar nga vendi i ngjarjes.
“Disa veprime të dhunshme përçarëse ndodhën në lagjen Rüttenscheid. Demonstruesit, disa prej tyre të mbuluar me kapuç, sulmuan forcat e sigurisë. U bënë disa arrestime”, ka bërë të ditur në platformën X policia në rajonin e Rhine-Westfalisë së Veriut, ku ndodhet Esseni.
Një zyrtar i lartë rajonal kishte paralajmëruar se “ngatërrestarë potencialisht të dhunshëm të së majtës ekstreme mund të jenë në mesin e protestuesve”.
“Ne jemi këtu dhe do të qëndrojmë”, ka deklaruar bashkëpresidentja e AfD-së, Alice Weidel, duke hapur kongresin dy-ditor, i cili filloi gjysmë ore me vonesë për shkak të bllokadave të rrugëve.
Si Weidel ashtu edhe bashkëpresidenti, Tino Chrupalla, u rizgjodhën për të udhëhequr partinë për dy vjet të tjera.
“Ne duam të qeverisim, fillimisht në lindje (të Gjermanisë), pastaj në perëndim, pastaj në nivel federal,” u ka thënë Chrupalla rreth 600 delegatëve.
Chrupalla tha se anëtarësimi i partisë ishte rritur me 60% në 46,881 anëtarë që nga janari i vitit të kaluar. Rreth 22,000 njerëz ishin bashkuar ndërsa 4,000 ishin larguar.
Në fillim të qershorit, AfD-ja pati rezultatin e saj më të mirë zgjedhor në BE që nga krijimi i partisë në vitin 2013, duke fituar 16% të votave dhe duke zënë vendin e dytë.
Ajo ishte prapa bllokut kryesor konservator të opozitës CDU-CSU, por përpara Social Demokratëve (SPD) – partia e kancelarit, Olaf Scholz – e cila është në pushtet në krye të një koalicioni të trazuar trepartiak.
