NATO-ja është në bisedime për t’i nxjerrë armët bërthamore nga magazinimi duke i vendosur në gatishmëri, përballë një kërcënimi në rritje nga Rusia dhe Kina, ka thënë kreu i aleancës, Jens Stoltenberg të hënën.
Ai i ka thënë gazetës britanike Telegraph se ka konsultime të drejtpërdrejta midis anëtarëve rreth kësaj çështjeje, duke mos ofruar detaje.
“Unë nuk do të hyj në detaje operacionale se sa koka bërthamore duhet të jenë funksionale dhe cilat duhet të ruhen, por ne duhet të konsultohemi për këto çështje. Kjo është pikërisht ajo që po bëjmë”, ka deklaruar Stoltenbergu.
“Transparenca ndihmon për të komunikuar mesazhin e drejtpërdrejtë se ne, natyrisht, jemi një aleancë bërthamore. Qëllimi i NATO-s është, natyrisht, një botë pa armë bërthamore, por për sa kohë që ekzistojnë armët bërthamore, ne do të mbetemi një aleancë bërthamore, sepse një botë ku Rusia, Kina dhe Koreja e Veriut kanë armë bërthamore dhe NATO-ja jo, është një botë më e rrezikshme”, ka shtuar ai.
Javën e kaluar shefi i NATO-s ka thënë se armët bërthamore ishin “garancia përfundimtare e sigurisë” e NATO-s dhe një mjet për të ruajtur paqen.
Presidenti rus, Vladimir Putin ka paralajmëruar vazhdimisht se Moska mund të përdorë armë bërthamore për të mbrojtur veten në rrethana ekstreme.
Ajo akuzon SHBA-në dhe aleatët e saj evropianë se po e shtyjnë botën në prag të konfrontimit bërthamor duke i dhënë Ukrainës armë me vlerë miliarda dollarë, disa prej të cilave po përdoren kundër territorit rus.
NATO-ja, e cila ka marrë një rol më të madh në koordinimin e furnizimeve me armë në Kiev, rrallëherë flet publikisht për armët, megjithëse dihet se SHBA-të kanë vendosur bomba bërthamore në disa vende në Evropë.
