Delegacionet diplomatike dhe krerë të shteteve nga 13 vendet e Evropës Juglindore kanë qëndruar të enjten në Shkup, për të përmbyllur përfundimin e mandatit njëvjeçar, të udhëheqjes së Maqedonisë së Veriut me Procesin e Bashkëpunimit në Evropën Juglindore.
Nisma ka për qëllim që të avancojë bashkëpunimin mes shteteve në fushën e sigurisë, ekonomisë, të drejtave të njeriut, por edhe demokracisë.
Po ashtu, edhe presidentja e Kosovës, Vjosa Osmani, ka marrë pjesë në Samitin e vendeve të Evropës Juglindore.
Ajo ka shpërndarë një fotografi familjare që u realizua në kuadër të Samitit të krerëve të shteteve të Procesit të Bashkëpunimit të Evropës Juglindore (SEECP).
“Në Shkup për Samitin e SEECP, së bashku me liderët e tjerë dhe përfaqësuesit nga rajoni”, ka shkruar Osmani në Facebook.
Siç thuhet në njoftimin e Presidencës, në këtë samit, Osmani iu bashkua krerëve të shteteve pjesëmarrëse për të biseduar rreth thellimit të bashkëpunimit me vendet e rajonit dhe partnerët ndërkombëtarë për të garantuar paqe, siguri, stabilitet, zhvillim ekonomik, politik e shoqëror në rajon.
Gjatë qëndrimit në Shkup, Osmani ka takuar homologen e saj maqedonase, me të cilën ka diskutuar për raportet bilaterale Kosovë-Maqedoni e Veriut dhe thellimin e bashkëpunimit.
Ministri i Punëve të Jashtme, Bujar Osmani, i cili ishte edhe kryesues i këtij procesi, hapi takimin ministror, në te cilin, megjithatë shumica e vendeve u përfaqësua me zëvendësministra, sekretarë shtetërorë dhe ambasadorë.
Ai ka thënë se në këtë samit është rikonfirmuar pozicioni në skenën ndërkombëtare.
“Një tjetër takim i suksesshëm ministror në Shkup. Konfirmuam edhe një herë pozicionin tonë në skenën ndërkombëtare. Krenar për këtë arritje. Dëshmuam se dimë të ruajmë kredibilitetin e pronësisë dhe lidershipit rajonal që kemi ndërtuar dhe avancuar ndër vite, përmes kësaj nisme të rëndësishme rajonale”, ka shkruar ministri Osmani në Facebook.
Ministri maqedonas Osmani, të enjten para samitit ka takuar ministrin e Punëve të Jashtme të Republikës së Turqisë, Hakan Fidan.
Ai ka njoftuar se me ministrin Fidan ka diskutuar për marrëdhëniet dypalëshe, lidhjet ekonomike, si dhe bashkëpunimi multilateral brenda organizatave ndërkombëtare, me fokus të veçantë në partneriteti në kuadër të NATO-s.
