Dogana e Kosovës ka bërë të ditur se ka kapur një sasi të konsiderueshme të mallrave të padeklaruara në pikën kufitare në Vërmicë
Sipas doganës, vlera e këtyre mallrave është 7,900 euro.
“Në hyrje të Pikës Kufitare të Kontrollit në Vërmicë ka arritur një veturë e drejtuar nga shtetas turk. Në pyetjen e zyrtarit doganor nëse kishte diçka për të deklaruar për zhdoganim, ai është përgjigjur negativisht”, ka njoftuar Dogana.
Pas kontrollit të detajuar në vijën e dytë, së bashku me zyrtarët policorë, është zbuluar një sasi e konsiderueshme e mallrave të padeklaruara “Pjesë rezerve për makineri të rënda”.
Gjatë kontrollit, janë gjetur edhe fatura e blerjes së mallrave.
Tutje në njoftim thuhet se me këtë rast, Dogana ka konstatuar se pala, në kundërshtim me Kodin Doganor , ka shkaktuar kundërvajtje doganore.
Dogana ka njoftuar se mallrat janë konfiskuar dhe janë ndërmarrë veprimet e nevojshme ligjore.
