Ndërsa vetë presidenti amerikan, Joe Biden, ka refuzuar të komentojë mbi vendimin ndaj Donald Trumpit, nga ekipi i tij i fushatës është dërguar mesazhi: “askush nuk është mbi ligjin”.
“Në New York pamë se askush nuk është mbi ligjin. Donald Trump gjithmonë ka besuar gabimisht se nuk do të përballej me pasojat për thyerjen e ligjit për përfitimet e tij personale”, ka shkruar Michael Tyler.
Tyler, që ia udhëheq fushatën Bidenit, ka shtuar se vendimi i gjykatës nuk e ndryshon faktin se amerikanët përballen me një realitet të thjeshtë.
“Ka vetëm një mënyrë për ta mbajtur Donald Trumpin jashtë Zyrës Ovale: në kutinë e votimit”.
Ish-presidenti amerikan Donald Trump është shpallur fajtor për falsifikimin e të dhënave biznesore të kompanisë.
Ai është shpallur fajtor në të 34 akuzat që rëndonin mbi të.
Trumpi akuzohej se kishte falsifikuar të dhënat për të fshehur rimbursimet që ia kishte bërë avokatit të tij, Michael Cohen, i cili i ka paguar aktores së pornografisë, Stormy Daniels, 130 mijë dollarë në fushatën presidenciale të 2016-s, në këmbim që ajo të mos e paraqiste publikisht pretendimin se me Trumpin ka pasur marrëdhënie seksuale një dekadë më herët.
