Ministri i Financave, Punës dhe Transfereve, Hekuran Murati, u takua me Ministren për Zhvillim Social dhe Familje të Katarit, Maryam bint Ali bin Nasser Al Misnad.
Siç njofton ministria gjatë këtij takimi, Murati prezantoi masat e Qeverisë së Kosovës për mbështetjen e grave, të rinjve dhe grupeve të cënueshme të shoqërisë.
Po ashtu thuhet se Murati ka përmendur shtesat për fëmijë dhe lehona, subvencionimin e pagës për të rinjtë përmes platformës Superpuna, heqjen e tarifave universitare, dhe ofrimin e bursave për gratë në teknologji dhe inovacion, si vetëm disa nga masat që portretizojnë punën e Qeverisë në këtë drejtim.
Ministri ka falenderuar Ministren Nasser Al Misnad për vizitën në Kosovë duke theksuar rëndësinë e shkëmbimit të praktikave më të mira ndërmjet dy vendeve.
E nga ana e saj, Ministrja Al Misnad përgëzoi Qeverinë e Kosovës për politikat dhe masat e zbatuara, duke vlerësuar sistemin e dixhitalizuar të ofrimit të shërbimeve sociale në Kosovë.
Tutje në njoftimin zyrtar thuhet se Al Misnad ka ftuar Ministrin Murati të nënshkruajë një memorandum bashkëpunimi për projekte të përbashkëta të cilat pritet të zbatohen në të ardhmen.
Për të konkretizuar këtë, pas takimit të sotëm, të dyja palët u pajtuan që të formohet një ekip teknik për të diskutuar projekte me potencial për bashkëpunim ndërmjet dy shteteve.
