Komisioni i Pavarur i Mediave (KPM), në mbledhjen e pestë të këtij viti, ka shqiptuar në total 8 mijë euro gjoba ndaj gjashtë të licencuarve.
KPM dënoi operatorin e shpërndarjes “ISP Broadcast”, pasi kishte gjetur se kishte shkelur njërën prej rregulloreve të KPM-së, duke mos e vendosur “RTK 2” në listën e kanaleve, pas kanalit informues.
Andaj, për të njëjtin operator u morë vendim që të dënohet me një gjobë prej 2 mijë euro, si dhe të informohet se duhet të vendosin “RTK 2”në listën e kanaleve, pas kanalit informues.
Ndërkaq, për ndërrim të pronësisë, KPM dënoi me nga 1 mijë euro “Travelingo TV”, “Suite TV” dhe “Positive Gold TV”.
Pas diskutimeve të Komisionit, ku u mësua se këto tri subjekte janë të të njëjtit pronar, por se ka shtuar një person si bashkë-pronar (anëtar të familjes), pa miratimin paraprak të KPM-së.
Po ashtu me 2 mijë euro gjobë u sanksionua edhe “TV Herc”, kurse me 1 mijë euro “Radio Herc”.
Edhe për këto dy subjekte u bë e ditur se kanë një pronar të njëjtë, mirëpo se ka ndryshuar certifikatën e biznesit pa aprovim paraprak nga ana e KPM-së, shkruan Betimi për Drejtësi.
Subjektet e dënuara për këto raste të pronësie, obligohen që brenda 30 ditëve të dorëzojnë në KPM edhe kërkesën për ndërrimin e pronësisë, së bashku me dokumentacionin e nevojshëm.
Gjithashtu në këtë mbledhje, KPM mori vendime edhe për disa raste të licencimit.
Me nga pesë vota për, kaluan edhe rekomandimet e Zyrës Ekzekutive të KPM-së për ndryshime të pronësisë dhe ripërtëritje të licencës për “Radio Sharri” dhe “Radio Plus”.
Ndërsa, për “Radio Max” u refuzua kërkesa për ripërtëritje të licencës.
Kurse, për “NTV” zyra ekzekutive kishte rekomanduar që të refuzohej kërkesa për licencë, mirëpo u vendos që të shqyrtohet në një mbledhje tjetër, derisa KPM të provojë të kontaktojë edhe njëherë me të, për shkak se kanë kaluar afërsisht dy vite që nga aplikimi i të njëjtit për licencim.
