Përkundër kërkesave të aleatëve që të tregon përmbajtje, Tel Avivi vazhdon të insistojë se do t`i përgjigjet sulmit iranian. Është bërë e ditur se kabineti i luftës në Izrael ka shqyrtuar plane të ndryshme të veprimeve ushtarake por, deri me tani, nuk është marrë asnjë vendim.
Njëkohësisht grupi G7 ka thënë se është duke përgatitur sanksione të reja ndaj Iranit.
Edhe pse një pjesë e madhe e aleatëve Izraelit, përfshirë shtetet e Bashkuara dhe Britaninë e madhe, kanë kërkuar që Tel Avivi të tregojë përmbajtje pas sulmit të 13 Prillit gjatë së cilit Irani lansoi më shumë se 300 fluturake pa pilot dhe raketa balistike drejtë Izraelit, duke mos dëshiruar të rrezikojnë spirale e cila do të nxisë një luftë të gjerë rajonale, Izraeli vazhdon të insistojë se ky sulm i precedent nuk do të kalojë pa përgjigje.
Është bërë e ditur se Kabineti Izraelit i luftës, gjatë ditës, shqyrtoi plane të ndryshme të veprimeve të mundshme ushtarake por se, deri me tani, nuk është marrë asnjë vendim, përderisa Teherani ka përsëritur se sulmet e së shtunës kanë qenë përgjigje legjitime ndaj bombardimit të konsullatës Iraniane në Damask dhe se nuk dëshiron rritje të mëtejme të tensioneve rajonale.
Megjithatë Teherani ka kërcënuar se çfarëdo reagimi ushtarak i Izraelit do të nxisë përgjigjje dhjetë herë më të madhe se ajo e 13 prillit.
Njëkohësisht, Tel Avivi zyrtar ka bërë të ditur se po i pezullon planet për fillimin e ofensivës së pritur në Rafah, në rripin e Gazës, përderisa nuk vendosen hapat e ardhshëm në lidhje me Iranin.
Ndërsa, grupi G-7, në të cilin marrin pjesë 7 prej ekonomive më të mëdha të botës, SHBA-të, Kanadaja, Gjermania, Franca, Italia, Japonia dhe BE ka bërë të ditur se është duke përgatitur një paketë të re të sanksioneve kundër Iranit.
Kryeministri Britanik Rishi Sunak deklaroi se koordinimi mes aleatëve do të sigurojë efekt maksimal të sanksioneve ndaj Iranit dhe individëve të cilët do të sanksionohen.
Por, shumë analistë besojnë se çfarëdo sanksione të reja mund të kenë vetëm efekt të kufizuar ndaj regjimit i cili me dekada ballafaqohet me sanksione të ndryshme ndërkombëtare.