Ndaj sulmeve të Iranit kundër Izraelit kanë ardhur reagime nga liderët botërorë. Disa dënojnë hapur Teheranin, kurse të tjerët bëjnë thirrje për një armëpushim të menjëhershëm në Gaza. Pothuajse njëzëri kërkohet përmbajtje gjatë një momenti tensioni të madh në Lindjen e Mesme.
Presidenti i Shteteve te Bashkuara, Joe Biden tha se SHBA “është e përkushtuar ndaj mbrojtjes së Izraelit”. “Angazhimi ynë për sigurinë e Izraelit kundër kërcënimeve nga Irani dhe përfaqësuesit e tij është i hekurt”, tha Biden në një deklaratë.
Izraeli po “punon ngushtë” me SHBA-në, Britaninë e Madhe dhe Francën, tha zëdhënësi ushtarak izraelit, admirali Daniel Hagari, duke shtuar se të tre “vepruan sonte” gjatë sulmeve iraniane.
Ne zhvillime tjera, analistët po spekulojnë se ky sulm i paprecedentë – nga shteti i Iranit në territorin izraelit – do të çojë në veprime hakmarrëse nga Izraeli.
Megjithatë, sipas CNN, duke cituar një zyrtar të administratës, presidenti Joe Biden i ka thënë tashmë kryeministrit izraelit Benjamin Netanyahu se Amerika nuk do të marrë pjesë në asnjë operacion sulmues kundër Iranit.
Sekretari i Përgjithshëm i OKB-së, António Guterres bëri thirrje për ndalimin e menjëhershëm të armiqësive në Lindjen e Mesme. “U bëj thirrje të gjitha palëve të ushtrojnë përmbajtje maksimale për të shmangur çdo veprim që mund të çojë në konfrontime të mëdha ushtarake në fronte të shumta në Lindjen e Mesme”, tha Guterres në një seri postimesh në Twitter në X.
Në një deklaratë, kryeministri britanik Rishi Sunak tha se Mbretëria e Bashkuar do të “vazhdojë të mbrojë sigurinë e Izraelit dhe atë të të gjithë partnerëve të saj rajonalë, përfshirë Jordaninë dhe Irakun.
Presidentja e Komisionit Evropian, Ursula von der Leyen, i quajti sulmet “të hapura dhe të pajustifikueshme”. “Të gjithë aktorët tani duhet të përmbahen nga përshkallëzimi i mëtejshëm dhe të punojnë për të rivendosur stabilitetin në rajon”, tha Von der Leyen.
Kina shprehu “shqetësim të thellë” për “përshkallëzimin aktual”, duke shtuar se ishte një “përhapje e konfliktit të Gazës” dhe një armëpushim duhet të zbatohet pa vonesë.
Arabia Saudite, një rival i madh rajonal i Iranit, theksoi rëndësinë e “parandalimit të çdo përkeqësimi të mëtejshëm” të krizës, duke paralajmëruar “pasoja të rënda” nëse situata përkeqësohet.
Ministria e Jashtme e Egjiptit i quajti zhvillimet e fundit një “përshkallëzim të rrezikshëm”. Ai tha se armiqësitë e fundit nuk ishin asgjë tjetër veçse një rezultat i drejtpërdrejtë i asaj që Egjipti ka paralajmëruar në mënyrë të përsëritur, në lidhje me rreziqet e zgjerimit të konfliktit në rajon si rezultat i luftës izraelite në Rripin e Gazës.
Katari, i cili luan një rol jetik në shumë konflikte në Lindjen e Mesme dhe gëzon marrëdhënie të ngushta ekonomike me Iranin, shprehu “shqetësim të thellë” dhe u bëri thirrje të gjitha palëve “të pushojnë përshkallëzimin, të qetësojnë tensionet dhe të ushtrojnë përmbajtje maksimale”.
Deklarata erdhën edhe nga liderë të tjerë të vendeve evropiane si Gjermania, Danimarka, Franca, Norvegjia dhe Austria.
