Reperi i njohur shqiptar, Fero, ra në prangat e policisë dje. Një video u shfaq kudo, ku shihej qartazi se si reperi dhunonte një person brenda makinës.
Mirëpo, Gazeta Express bën me dije se Fero do të dalë nesër para gjykatës.
Zëdhënësi i Gjykatës Themelore në Gjilan, Sabit Shkodra, ka thënë për Express se seanca dëgjimore ndaj Feros do të mbahet nesër në orën 09:30.
“Mund të ju konfirmoj që është pranuar kërkesa për caktimin e masës së paraburgimit ndaj të pandehurit në fjalë, ndërsa seanca dëgjimore do të mbahet me datë 27.07.2022, 09:30 minuta”.
Nga ana tjetër, avokati i Feros, Egzon Halimi, në një bisedë telefonike për Telegrafin ka treguar detaje nga ngjarja që ndodhi.
Halimi thekson se Fero është provokuar nga personi që ka qenë në makinë.
“Fero ka qenë duke pirë kafe në lagjen e tij, ka parë disa të rinj poshtë te kafenetë dhe kishte vendosur t’i qeraste, kur në një moment ka kaluar një veturë, e cila e ka provokuar atë, gjë që ka çuar deri në sulmin e tij”, theksoi avokati i reperit.
Avokati shtoi se personi në makinë kishte vendosur një këngë të Unikkatilit, ku në të shahej dhe ofendohet rëndë reperi Fero.
“Personi brenda veturës ka qenë duke lëshuar një këngë të Unikkatilit, në të cilën reperi Fero shahet dhe ofendohet rëndë dhe mu përmes së saj, ai e ka provokuar Feron, ku ky i fundit nuk e ka duruar presionin dhe ka nisur konfliktin në afekt. Personat që i ka sulmuar as ky nuk i njeh, pasi rasti ka ndodhur pa paramendim, pra nuk ka të bëjë me ndonjë hasmëri”, nënvizoi avokati Halimi./iconstyle
