Ministrja e Arsimit, Shkencës, Teknologjisë dhe Inovacionit, Arbërie Nagavci, i ka dorëzuar kryeministrit të Kosovës, Albin Kurti, raportin e fazës së parë të rishikimit të teksteve të gjuhës shqipe dhe matematikës për klasat I deri IX.
Kryeministri Kurti ka thënë se tema e këtij takimi është çështje thelbësore për arsimin, “pasi rishikimi i teksteve është vendimtar për cilësinë e arsimit dhe edukimit, ku me kërkesë të MASHTI-it ka filluar procesi i rishikimit të 38 teksteve, 21 të gjuhës shqipe dhe 17 të matematikës”.
“Lënda e gjuhës dhe ajo e matematikës janë vendimtare për formimin e nxënësve dhe për karrierat e tyre në të ardhmen”, ka thënë ai, sipas njoftimit të Zyrës së Kryeministrisë.
Në lidhje me raportin e përgatitur, kryeministri u shpreh se paraqet një bazë të mirë për korrigjimin dhe avancimin e teksteve mësimore.
“Shpresojmë dhe besojmë se ky raport do të nxisë debat publik të mësimdhënësve, prindërve, nxënësve, ekspertëve të arsimit dhe të gjithë atyre që e kuptojnë që ardhmëria e vendit tonë varet nga ngritja e cilësisë së arsimimit dhe të edukimit”, ka thënë Kurti.
Nagavci ka deklaruar se kërkesa për fillimin e këtij procesi ka qenë insistim i MASHTI-it dhe me mbështetjen e BE-së ka përfunduar faza e parë, “ku janë rishikuar tekstet e gjuhës shqipe dhe matematikës, ndërsa janë në proces të fillimit të rishikimit tekstet e shkencës”.
Ajo bëri të ditur se tekstet e gjuhës shqipe dhe matematikës janë zgjedhur duke pasur parasysh rezultatet e dobëta të testit PISA.
Ministrja shtoi se përveçse do të vazhdohet me rishikimin e teksteve të tjera, “po ashtu planifikojmë që të gjitha këto raporte t’i ndajmë më shtëpitë botuese me autorët e teksteve dhe do të jetë obligim i tyre që t’i përmirësojnë në bazë të gjetjeve të cilat janë bërë”.
Procesi i rishikimit të teksteve shkollore udhëhiqet nga Këshilli i Ekspertëve për Tekste Shkollore dhe Planprograme Mësimore i MASHTI-t me ndihmën e ekspertëve ndërkombëtarë dhe vendorë.
