Sot është inaguruar Qendra Shtetërore Trajnuese për Siguri Kiberentike, në kazermën “Adem Jashari”.
Në këtë ceremoni kanë marrë pjesë kryeministri i Kosovës, Albin Kurti, ministri i Mbrojtjes, Ejup Maqedonci dhe ambasadori i Mbretërisë së Bashkuar, Jonathan Hargreaves.
Maqedonci ka thënë se synimi i tyre është që përmes kësaj qendreje t’i trajnojnë instutucionet e sigurisë që t’i bëjnë ballë çdo sulmi të kësaj natyre.
“Qendra Shtetërore Trajnuese për Siguri Kibernetike do të ofrojë trajnime me qëllim të ngritjes së ndërgjegjësimit për rreziqet në fushën e sigurisë kibernetike, të përmirësoj aftësitë profesionale dhe të ndihmojë në ngritjen e niveleve të sigurisë kibernetike të institucioneve qeveritare, operatorëve të shërbimeve esenciale dhe ofruesve të shërbimeve digjitale për të arritur kapacitetet për mbrojtjen e infrastrukturës kritike në vend”, ka thënë Maqedonci.
Ministri ka treguar se Cyber Range që do të ofroj ushtrime në fushën e sigurisë kibernetike për të gjithë ata që do të ndjekin trajnimin është donacion nga Ambasada Amerikane.
Maqedonci ka thënë sekKurikula për Qendrën Shtetërore Trajnuese për Siguri Kibernetike është hartuar me mbështeje nga Ambasada Britanike dhe është implementuar nga Qendra e Gjenevës për Qeverisjen e Sektorit të Sigurisë (DCAF) me ekspertë vendor dhe ndërkombëtar.
“Kurrikula përfshin një gamë të gjerë temash që trajtojnë sigurinë kibernetike në nivel individual dhe organizativ, 14 kurse të trajnimit, 5 prej tyre përcjellen edhe me ushtrime praktike, si dhe 2 ushtrime në tavolinë (TTX) . Përmes zbatimit të kësaj kurrikule, kjo qendër përbën një shtyllë të re rëndësishme të mbrojtjes së sigurisë së vendit”, ka thënë ai.
Tutje ai është shprehur se personeli i sektorit publik dhe privat që kanë infrastrukturë kritike në Republikën e Kosovës të trajnuar në këtë qendër të pajisur me shkathësi digjitale, kompjuterike dhe kibernetike do të përbëjnë murin mbrojtës ndaj çdo sulmi të kësaj natyre.
