Donald Trump ka përdorur një intervistë me “Fox News” për të krahasuar problemet e tij ligjore me persekutimin e figurës së opozitës ruse Alexei Navalny, i cili vdiq në burg javën e kaluar.
Në intervistën të martën, ish-presidenti amerikan ka thënë se Navalny ishte “njeri shumë i guximshëm, i cili ndoshta nuk duhej të kthehej në Rusi”, por nuk e fajësoi askënd për vdekjen e tij.
Presidenti Joe Biden dhe liderë të tjerë perëndimorë kanë fajësuar presidentin rus Vladimir Putin për vdekjen e Navalnyt, ashtu si edhe Nikki Haley, e cila është shumë pas Trumpit si rivalja e vetme e mbetur për nominimin presidencial republikan.
Në intervistën njëorëshe të transmetuar në “Fox News”, Trumpi kundërshtoi gjobën prej 355 milionë dollarësh për mashtrim që iu shqiptua në një gjyq në New York, duke thënë se “është një formë e Navalnyt”.
“Është një formë e komunizmit apo fashizmit”, shtoi ai.
Pavarësisht kërkesave të moderatores Laura Ingraham, Trump nuk e përmendi Putinin kur u pyet për Navalnyn.
“Ai ishte djalë shumë i guximshëm sepse u kthye. Ai mund të kishte qëndruar larg, dhe sinqerisht, ndoshta do të kishte qenë shumë më mirë të qëndronte larg dhe të fliste nga jashtë vendit”, ka deklaruar Trump.
“Po ndodh edhe në vendin tonë. Po kthehemi në një vend komunist në shumë drejtime. Unë kam tetë ose nëntë gjyqe të gjitha për faktin se … jam në politikë”, ka deklaruar ai.
Kremlini ka mohuar përfshirjen në vdekjen e Navalnyt dhe ka thënë se pretendimet perëndimore se Putin ishte përgjegjës janë të papranueshme.
Të dielën, Trumpi shkroi në një postim në “Truth Social” se vdekja e Navalnyt në një koloni penale të Arktikut javën e kaluar e kishte bërë atë “më të vetëdijshëm për atë që po ndodh” në Shtetet e Bashkuara. Trump nuk dha detaje, por shpesh ka hedhur poshtë 91 akuzat penale kundër tij si të motivuara politikisht, një pretendim që prokurorët e mohojnë.
“Pse Trumpi fajëson gjithmonë Amerikën? Putin është përgjegjës për vdekjen e Navalnyt. Pse Trump nuk mund ta thotë këtë?”, ka kritikuar ashpër presidenti Joe Biden postimin e Trumpit.
