Organizata Botërore e Shëndetësisë ka thënë se spitali “Nasser” në Gaza ka ndaluar së funksionuari pas bastisjes izraelite, raporton “BBC”.
Forcat izraelite u futën në spital të enjten, duke thënë se kanë informata nga inteligjenca se pengjet e marra nga Hamasi po mbahen atje.
OBSH-ja ka thënë se nuk është lejuar të futet në kompleks për ta vlerësuar situatën.
Izraeli është fokusuar në fushatën kundër Hamasit në qytetin jugor të Gazas, Khan Younis dhe ka lënë të kuptojë se mund të vazhdojë edhe në jug për në Rafah.
“Spitali Nasser në Gaza nuk është më funksional, pas një rrethimi të gjatë njëjavor pasuar nga bastisjet që po vazhdojnë”, ka shkruar shefi i OBSH-së, Tedros Adhanom Ghebreyesus në platformën “X”. “Si dje ashtu edhe pardje, ekipeve të OBSH-së nuk iu lejua qasja në spital për të parë gjendjen e pacientëve”.
Ghebreyesus ka thënë se ekipet e OBSH-së kishin arritur në kompleks për të ofruar karburante.
“Janë ende 200 pacientë në spital. Të paktën 20 prej tyre duhet menjëherë të dërgohen në spitale tjera për të marrë kujdes mjekësor”, ka thënë Ghebreyesus.
Ministria e Shëndetësisë në Gaza ka thënë se vetëm katër mjekë kanë mbetur në spital dhe po mundohen të kujdesen për pacientët.
Një burim brenda spitalit, që ka dashur të mbetet anonim, i ka thënë “BBC” se 11 pacientë vdiqën pas ndërprerjes së furnizimit me energji elektrike dhe oksigjen. Po ashtu ka thënë se disa mjekë janë arrestuar.
Të shtunën, ushtria izraelite ka njoftuar se trupave u është thënë të mbajnë spitalin në funksion dhe se është dërguar ushqim e ujë. I pyetur këtë mëngjes për gjendjen e spitalit, një zëdhënës i ushtrisë ka thënë se do të shohin.
Luftime të ashpra janë zhvilluar rreth spitalit Nasser me javë. Izraeli vazhdimisht ka pretenduar se Hamasi po i përdor spitalet, si dhe shkollat, si baza operacionale.
Ushtria e Izraelit ka thënë se ka vrarë 20 luftëtarë të Hamasit dhe ka sekuestruar një numër të armëve në zonën rreth spitalit.
“Në ditën e kaluar, dhjetëra terroristë janë eliminuar dhe janë sekuestruar sasi të mëdha të armëve”, është thënë nga ushtria e Izraelit.
