Një zyrtar policor është suspenduar pas hetimeve të para nga Inspektorati i Policisë së Kosovës (IPK), pasi që i njëjti dyshohet se ka gjuajtur me armë në fshatin Jezercë të Ferizajt.
Suspendimin e tij e ka konfirmuar edhe kryeshefi ekzekutiv i IPK-së, Kushtrim Hodaj.
“Po një zyrtar policor është i dyshuar për gjuajte me armë, i njëjti është suspenduar dhe po hetohet në procedurë të rregullt sipas autorizimit të Prokurorisë”, ka thënë Hodaj.
Lidhur me rastin në fjalë, policia përmes raportit 24 orësh ka bërë të ditur se ngjarja ka ndodhur dje rreth orës 17:15.
Sipas raportit, ankuesi mashkull kosovar, ka njoftuar se dy meshkuj të panjohur kishin shtënë me armë zjarrit në drejtim të pyllit dhe më pas janë larguar me vetura.
“Lidhur me rastin janë shoqëruar dy të dyshuar meshkuj kosovarë. Pas intervistimit me vendim të prokurorit rasti shkon në procedurë të rregullt”, thuhet në raportin e policisë.
Kujtojmë se Inspektorati Policor i Kosovës, nga janari e deri më tani kanë pranuar mbi 900 ankesa, derisa ka rekomanduar suspendimin e mbi 100 policëve, ndërkaq mbi 90 të tjerë janë të arrestuar.
